![GSH APP](https://gazetashqiptare.al/wp-content/uploads/2022/04/gshok.jpg)
![Download on Apple Store](https://balkanweb.com/wp-content/uploads/2019/01/ios.jpg)
![Get it on Google Play](https://gazetashqiptare.al/wp-content/uploads/2022/04/android-app.png)
Me 31 vota gjithsej, të gjitha pro, Këshilli Bashkiak i Tiranës vendosi miratimin e rendit të ditës, për t’u votuar në Këshillin Bashkiak të Tiranës.
Rritja e çmimi të ujit tashmë është fakt i kryer. Por nisma e kryetarit të Bashkisë, Erion Veliajt nuk do të ishte i mundur pa votën e dy këshilltarëve të LSI.
Dy këshilltarët Agim Kraja dhe Genta Mezini, të zgjedhur të LSI-së nuk iu bindën vendimit të kësaj force politike dhe ngritën kartonin jeshil në sallë për një nga vendimet më të rëndësishme të Bashkisë dhe që prek direkt xhepat e qytetarëve.
“Ky investim është tepër i domosdoshëm sepse të gjitha tubacionet e Tiranës janë të amortizuara dhe ato çmojnë. Ka 50 vjet që nuk është ndërru një tub. Nuk është shumë problem rritja e ujit në kët përqindje” u shpreh këshilltari i LSI-së Agim Kraja para votimit.
Ndryshe nga LSI, këshilltarët e Partisë Demokratike dolën nga salla e mbledhjeve duke kërkuar të dalin edhe kolegët e tyre të LSI. Nëse kjo do të ndodhte, atëherë mbledhja do të ndërpritej për shkak të mungesës së kuorimit.
Nard Olli, kreu i këshilltarëve demokratë e quajti këtë një provë se LSI po shkon drejt “opozitës –pazar”, ndryshe nga sa i ka premtuar qytetarëve.
“Këshilltarët e LSI-së, të dalin menjëherë nga salla ose LSI të kërkojë përjashtimin e tyre nëse nuk i janë bindur. Ne e dimë si funksionon LSI. Nëse është e kundërta, LSI të distancohet. Nëse LSI është në lartësinë e opozitës ballore që ka premtuar, le të dalë jashtë” u shpreh Olli.
Veliaj premton se me rritjen e çmimit, Tirana do të ketë 24 orë ujë pas pesë vitesh. Çmimi aktualisht sipas Veliajt është më i ulët se në Durrës, Lezhë, Fier, Korçë etj.